EY RİZA...
Əhli-beyt (ə) şairi Mirfətulla Ağanın İmam Riza(ə)ya eşqlə dolu şeirini mövlud münasibəti ilə əziz Rizvan.Net oxucularına təqdim edirik.
EY RİZA!
Bizi gəl qovma pənahi ələmindən ağacan
Naümid eyləmə babi kərəmindən ağacan
* * * * *
Ey Riza ey özü məzlum qəriblər atası
Gözümüz var dəri-cudində1 Cəvadın atası
Sailə naz eləməz babul-həvaic balası
Çəkmərik əl bu dəri-möhtərəmindən ağacan!
* * * * *
Ey Riza, olma riza qəlbimiz həsrətlə dola
Var ümid hacətimiz burda bəravərdə ola
Ağalıq eylə qapından əli boş salma yola
Gedirik, doymadıq əmma, hərəmindən ağacan!
* * * * *
Mə`siyət başımızı gərçi salıbdır aşağa
İstədin didivə2 gəldik elə hörmət qonağa
Bazdidə3 gəl o dəm ki, yetişər can dodağa
Ta öpək eşq ilə xaki qədəmindən ağacan!
* * * * *
Xoş onun halına Tusə gələ izzət qazana
Yol tapar həşridə sayəndə gəlib daldalana
Qoymaram - sən demisən - zairimi odda yana
Mən it olsam da ayrıma həşəmindən ağacan!
* * * * *
İldə bu Tusidə Mövla, neçə mö`cüz görünər
Sərətani4 də gəlib rəxti-şəfayə5 bürünər
Çarəsiz dərdi olanlar üzü üstə sürünər
Kam ala ta o məsihayi dəmindən ağacan!
* * * * *
Sevinər sail ürəkdən gələ şəh xidmətinə
Şəh keçər pisləri də yaxşıların hörmətinə
And verrəm mən o Zəhra anavun ismətinə
Silə vursan bizi salma qələmindən ağacan!
* * * * *
Qəbrivə qoymuru kəsrət6 çata zəvvarın əli
Bağlıyıb Kərbübəla yolların əşrarın əli
Vəli bilmillə ki bağlanmaz ələmdarın əli
Bizə də təzkirə al qolsuz əmundan ağacan!
* * * * *
Ey Hüseyn tə`ziyəsində evinə qarə çəkən
Ağladıb İbn Şəbibi üzə göz yaşı tökən
Kəfənə peykərini əhli Sənabad bükən
Cəddivin dərdü qəmi çoxdur qəmindən ağacan!
Hazırladı: Məsum Əlizadə
--------------------------------------------------------------------------------------
1-Ehsan qapında, 2-Görüşünə, 3-Yenidən görüşə, 4-Xərçəng xəstəliyinə tutulan, 5-Şəfa libasına, 6- Camaatın çoxluğu