İMAM HÜSEYNİ (Ə) ZİYARƏT ETMƏYİN QAYDASI
Müfəzzəl (imam Sadiqin (ə) şagirlərindəndir) deyir: “Həzrət mənə buyurdu ki, Müfəzzəl heç Hüseynin (ə) ziyarətinə gedirsən? Cavabında dedim ki, gedirəm.
Deyir ki, həzrət mənə baxıb buyurdu:
–O ziyarəti etməsən ondan yaxşıdır.
–Ağa necə ola bilər ki, o ziyarətə getməməyim getməyimdən yaxşı olsun?
Həzrət buyurdu:
–Ona görə ki, siz bir yerə yığılaraq deyib gülə-gülə gedirsiniz, rahat yerdə qalır və ziyarət edib qayıdırsınız. Elə bilirsiniz oldunuz Kərbəlayı. Halbuki o həzrəti susuz öldürüblər, o həzrəti ac öldürüblər. O həzrət şəhid olan vaxt nə halda idı? Bax, ziyarəti də elə həmin halla etməlisən. Ondan sonra o fəzilətləri həmin şəxsə verərlər.
İmam Sadiqdən (ə) olan ikinci hədis belədir: ”İmam Hüseynin (ə) ziyarətinə gedərkən ürəyi sınıq, təvazökarcasına, qəmli-qüssəli halda ac və susuz getməlisən. Çünki o həzrət ac və susuz şəhid oldu. Həzrət torpaq üstündə şəhid oldu. Belə halla get ziyarət et, hacətlərini istə və qayıt gəl. Orada qalıb oranı özünə vətən etmə!”
Başqa bir hədisdə deyilir: “Hər kim imam Hüseynin (ə) qəbrinin ziyarətinə piyada getsə, Allah həmin şəxs üçün min savab yazar, min günahını pozar və min dəfə dərəcəsini qaldırar. Sonra buyurur: Fərat çayına yetişdin, orada dayan, Fərat suyu ilə qüsl al. Qüslü bitirdikdən sonra ayaqqabılarını çıxart və oradan qəbirə qədər ayaqyalın get. Yeriyəndə də zəlil bəndələr kimi yol yeri!”
Məhəmməd ibn Müslim nəql edir: İmam Sadiqdən (ə) soruşdum:
–Ey peyğəmbər balası! Mən sənin cəddinin ziyarətinə gedirəm. Kərbəlaya da həccə gedən şəxslər kimi gedim?
Həzrət buyurdu:
–Bəli. Necə həccə gedirsənsə, eləcə də Kərbəlaya get!
Sonra həzrət həmin səfərin ədəb-ərkanını açıqlayaraq buyurdu:
–Yol-yoldaşlarına qarşı bəd əxlaq olma. Xoş sözlərdən başqa heç bir şey söyləmə. Bacardığın qədər Allahı zikr et. Təmiz paltarla ziyarətə get. Ziyarətə başlamazdan öncə qüsl et. Qəlbində xüzu və xüşu olan halda ziyarətə yollan. Nə qədər bacarırsan, bir o qədər hərəmdə dua et və namaz qıl. Peyğəmbər və Ali Peyğəmbərə çoxlu salavat de. Vaxtını sənə lazım olmayan şeylərə sərf etmə. Gözünü haram baxışlardan qoru. Əgər yolda birinin nəyəsə ehtiyacı olsa, dayan və köməklik göstər. Getdiyin mömin qardaşlarınla cibiniz bir olmalıdır. Yolda təqiyyə lazım olsa, təqiyyə et. Allahın haram buyurduqlarının hamısından çəkin! Əgər dediyim kimi ziyarət etsən, onda sən düzgün ziyarət etmisən. Əgər insan ömründə bir dəfə belə bir ziyarət etsə, bu ziyarət onun bütün ömrünə bəs edər. Qeyd olunan fəzilətlərin hamısını Allah bu şəxsə verər.”
Hənnam ibn Subəyr deyir: “Atam mənə imam Sadiqdən (ə) nəql edib: İmam atama buyurdu: “Sən cəddim Hüseyni hər gün gedib ziyarət edirsən?
–Ağa xeyr!
–Həftədə bir dəfə gedə bilirsən?
–Xeyr!
–Ayda bir dəfə gedə bilirsən?
–Xeyr!
–İldə bir dəfə gedə bilirsən?
–Bəzi vaxtlar gedirəm. Həzrət mənə baxıb buyurdu:
–Sən imam Hüseynin (ə) barəsində sanki, cəfa edirsən. Mən susdum. Həzrət buyurdu:
–Əgər bacarsan, hər gün ziyarət et. Bacarmasan, həftədə bir dəfə et! Dedim:
–Mövlam mən uzaqda yaşayıram. Tez-tez getməyə imkanım yoxdur. Həzrət buyurdu:
–Sənə bir ziyarət öyrədim, hər gün əməl et. Hətta uzaqda olsan da. Gündə bir dəfə çıx damın üstünə və yaxud üstü açıq bir yerə. Bir sağa bax, bir sola və başını göyə qaldırıb imam Hüseynin (ə) hərəmini niyyət edərək de:
–Əssəlamu ələykə Ya Əba Əbdillah.
–Əssəlamu ələykum və rəhmətullahi və bərəkatuh.
Sonra Həzrət buyurdu: “Belə etsən, (müstəhəb) həccin və ümrənin savabını sənə verərlər.
Kitabın adı: Əhli-beytin məqamı
