ŞABANİYYƏ XÜTBƏSİ
Şeyx Səduq mötəbər sənədlə İmam Rzadan (ə), o da öz atalarından, onlar da İmam Əlidən (ə) belə nəql etmişlər:
“Bir gün peyğəmbər bizə bir xütbə oxudu, sonra buyurdu: “Ey camaat, həqiqətən Allahın ayı rəhmət və bərəkətlə sizə tərəf üz tutmuşdur. Bu ay, Allah yanında ən yaxşı ay, onun günləri ən yaxşı gün, gecələri ən yaxşı gecə və saatları ən yaxşı saatdır. Bu ayda Allah sizi öz qonaqlığına dəvət edib və siz ilahi kəramətə şamil olmuşsunuz. Sizin bu ayda nəfəsləriniz zikir savabı, yuxunuz ibadət savabı daşıyır. Sizin bu ayda əməlləriniz və dualarınız qəbul olunmuşdur. Günahlardan və pis sifətlərdən təmizlənmiş qəlblərlə, xalis niyyətlərlə Allah-taaladan istəyin ki, sizi bu ayda oruc tutmağa və Quran oxumağa müvəffəq etsin.
Bu böyük ayda Allahın rəhmətindən məhrum olan şəxs həqiqətən bədbəxtdir. Siz bu ayda ac və susuz qalmaqla Qiyamət gününün aclığını və susuzluğunu xatırlayın. Öz yoxsul və kimsəsizlərinizə əl tutun. Qocalarınıza hörmət edin, uşaqlarınıza rəhm edin, qohum-əqrəbalarınıza mehribanlıq göstərin. Dilinizi, deyilməsi yasaq olan şeylərdən saxlayın. Gözlərinizi baxılması halal olmayan yerlərə örtün. Qulaqlarınızı eşidilməsi halal olmayan şeylərə bağlayın. Başqalarının yetim qalan uşaqları ilə mehriban olun ki, sizdən sonra sizin də uşaqlarınızla mehriban olsunlar. Günahlardan əl çəkib Allaha tərəf qayıdın.
Namaz vaxtlarında əllərinizi duaya qaldırın, çünki namaz vaxtları ən yaxşı vaxtlardır. Allah-taala bu vaxtlarda öz bəndələrinə rəhmət gözü ilə baxır. Onunla münacat edənlərə cavab verir, onu çağıranlara ləbbeyk deyir. Onu istəyənlərin istəyini yerinə yetirir. Ey insanlar həqiqətən sizin canınız əməllərinizə bağlıdır. Belədirsə, onda Allah tərəfindən bağışlanmaqla özünüzü azad edin. Sizin çiyninizin yükü günahlarınızla ağırlaşmışdır. Onu, uzun səcdələrlə yüngülləşdirin.
Bilin ki, Allah-taala bu ayda namaz qılan və səcdə edənlərə əzab etməyəcəyinə and içmişdir və onları Qiyamət günü cəhənnəm odu ilə qorxutmayacağını bildirmişdir. Ey camaat, əgər bu ayda bir mömin şəxsə iftar versəniz, onun üçün qul azadetmə savabı yazılar və onun keçmiş günahları bağışlanar”.
Səhabədən biri soruşdu: “Ey Allahın Rəsulu, bizim hamımızın buna imkanı çatmır”.
Həzrət — buyurdu: “Xurmanın yarısı və ya bir içimlik su qədər də olsa, ona iftar verin və cəhənnəm odundan qurtulun. Allah-taala bundan da imkansızlara, bu savabı verər. Ey insanlar, bu ayda öz əxlaqını gözəlləşdirən başqalarının ayaqlarının büdrədiyi bir vaxtda, Sirat körpüsündən asan keçəcək. Hər kəs bu ayda öz xidmətçisinin işini yüngülləşdirsə, Allah onun hesabını Qiyamət günü asanlaşdırar. Hər kəs bu ayda insanlara pisliyi tərk etsə, Allah-taala öz qəzəbinin Qiyamət günü ondan saxlayar. Hər kəs bu gündə atasız bir yetimi əzizləyərsə, Allah onu Qiyamət günü əzizləyər. Hər kəs bu ayda öz qohum-əqrəbası ilə əlaqə saxlasa, Allah onu Qiyamətdə öz rəhmətinə daxil edər. Hər kəs bu ayda öz qohum-əqrəbası ilə əlaqəsini pozsa və yaxşılığını onlardan əsirgəsə, Allah Qiyamət günü öz əlaqəsini ondan kəsər. Bu ayda müstəhəb namazlar qılan şəxsi, Allah cəhənnəm odundan azad edər. Bu ayda bir vacib namaz qılan şəxs, başqa aylarda qıldığının yetmiş bərabərini alar. Hər kəs bu ayda mənə çox salavat göndərsə, onun əməl tərəzisi bütün tərəzilərin ağırlaşdığı bir gündə, yüngülləşər. Bu ayda bir ayə Quran oxuyan şəxs, başqa aylarda bütöv Quranı oxuyan şəxs kimidir. Ey insanlar, həqiqətən bu ayda Cənnətin qapıları açıqdır, Allahdan onu sizin üzünüzə bağlamamasını istəyin. Cəhənnəmin isə qapıları bağlıdır. Allahdan istəyin ki, onu sizin üzünüzə açmasın.
Bu ayda şeytanları zəncirlənmişlər. Allahdan istəyin ki, onları sizə hakim etməsin.
Əmirəl-möminin Əli ◊ soruşdu: “Ya Rəsuləllah, bu ayın ən gözəl əməli nədir?”
İslam Peyğəmbəri — buyurdu: “Ey Əbəl-Həsən, bu ayın ən yaxşı və fəzilətli əməli Allahın günah və haram buyurduğu işlərdən çəkinməkdir.”1
Hədislərdən məlum olduğu kimi, mübarək Ramazan ayı çox bərəkətli, fəzilətli bir aydır. O, ibadət edərək ruhu saflaşdırmaq, dua etmək, gecələr oyaq qalmaq, nəfsi təkmilləşdirmək ayıdır. Bu ayda edilən ibadət sair aylardakı ibadətlərdən bir neçə qat artıq savaba malikdir. Hətta möminin yuxusu və nəfəs çəkməyi belə, ibadət savabına malikdir. Bu ayda Cənnət qapıları möminlərin üzünə açılır, Cəhənnəm qapıları isə bağlanır. Allahın mələkləri camaatı daim Allaha ibadətə çağırır. Xüsusilə, səhər çağları və Qədr gecələri. Belə ki, o gecəni oyaq qalıb ibadət etmək min aylıq ibadətdən fəzilətlidir.
Allah-taala bu ayda bütün möminləri (mənəvi) qonaqlığa dəvət etmişdir. Bu dəvətin xəbərini peyğəmbərlər gətirmişdir. Qonaq sahibi mütləq yaxşılıq sahibi Allah, qonağa xidmət edənlər Onun müqərrəb mələkləridir. Qonaqlar isə möminlərdir. İlahi nemət süfrəsi açılmışdır. Onda gözün görmədiyi, qulağın eşitmədiyi, heç bir bəşərin ağlına belə gəlmədiyi müxtəlif nemətlər, hədiyyələr və kəramətlər vardır. Allah tərəfindən olan müvəffəqiyyət hər bir cəhətdən hazırdır ki, öz hümmət və ləyaqətimiz qədərində ondan istifadə edək. Əgər qəflət etsək, peşmançılıq və həsrətin heç bir faydası olmayan qiyamət günündə peşman olacağıq...”
1. “Vəsailuş şiə”, c. 7, səh. 227
Tags: MÜXTƏLİF DİNİ MÖVZULAR
